Fransiyadagi tartibsizliklar: Makron xalqqa murojaat qildi, AQSh esa chegarani yopishni talab qilmoqda
Namoyishchilarning talablariga javoban hukumat ularni yaqin kunlarda siyosiy partiyalar, kasaba uyushmalari, maktab oʻquvchilari, talabalar, oʻqituvchilar va ish beruvchilar bilan birgalikda muhokama qiladi; uchrashuvni bosh vazir Sebastyan Lekornyu tashkil etadi.
Namoyishlardan soʻng Emmanuel Makron tartibsizliklar va talon-torojlarni qoraladi. Prezident vaʼda berganidek, bunday harakatlarni uyushtirganlarga nisbatan qatʼiy choralar koʻriladi; uning qoʻshimcha qilishicha, prefektlar va merlar mitinglarni taqiqlash huquqiga ega.
Makron hayot qiymati va yoqilgʻi narxiga oid talablar mamlakat koʻchalariga bir necha yuz ming kishini olib chiqqanini maʼlum qildi. U zoʻravonliklarni “oʻta soʻl guruhlar ichidagi igʻvogarlar” va ularga qoʻshilgan jinoyatchilar zimmasiga yukladi. Prezident Limoj meri binosiga oʻt qoʻyilgani, Liondagi turistik axborot ofisida yongʻin chiqqani, Marsel munitsipalitetiga bostirib kirilgani va Bordodagi prefekt qarorgohiga hujum qilinganini eslatdi. Bir necha yuz nafar politsiyachi va jandarm jarohat oldi.
Prezidentning fikricha, vayron qilingan mol-mulk uchun haq toʻlash, talonchilar yetkazgan zararni esa qoplash kerak. Makron yoqilgʻi narxining oshishini Fors koʻrfazidagi mojaro bilan izohladi; uning aytishicha, Fransiya bu mojaroda ishtirok etmayapti. U siyosiy kelishmovchiliklarni ochiq uchrashuvlarda, OAVda va tinch namoyishlar vaqtida muhokama qilishga chaqirdi.
Donald Tramp Fransiya yetakchisini chegarani yopishga va mamlakatda yuz berayotgan voqealar ustidan nazoratni tiklashga chaqirdi. Il-de-Frans poytaxt mintaqasida boshlangan namoyishlar butun mamlakatni qamrab oldi. Litsey oʻquvchilari sinflarning haddan tashqari toʻlib ketganiga, oʻqituvchilar yetishmasligiga, taʼlim muassasalarining yomon ahvoliga va dars jadvalining ortiqcha yuklanganiga qarshi chiqmoqda.
