Oʻzbekiston Senati Pokiston bilan kelishuvlar ijrosini baholadi
Parlament nazorati qator yoʻnalishlarda ortda qolish holatlarini aniqladi. Yigʻilish ishtirokchilari masʼul tomonlar hamkorligini yaxshilashga chaqirdi.
Investitsiyalar, sanoat, savdo, qishloq xoʻjaligi, raqamli texnologiyalar va boshqa sohalardagi hamkorlik boʻyicha tegishli vazirliklar hamda idoralar vakillari hisobot berdi. Hamkorlikning amaliy jihatlarini Oʻzbekistonning Pokistondagi elchixonasi xodimi yoritib berdi.
Ishtirokchilar Oʻzbekiston prezidentining 2026-yil 5–6-fevral kunlari Pokistonga davlat tashrifidan keyin kelishuvlarni amalga oshirish masalasini muhokama qildi. Vazirlar Mahkamasi ularni bajarish boʻyicha yoʻl xaritalarini tasdiqlagan.
Ishtirokchilarning fikricha, kelishuvlar samaradorligi faqat hisobotlarga emas, balki amaliy natijalarga qarab baholanishi kerak. Pokiston tomoni bilan kelishishni talab qiladigan masalalarni parlamentlararo muloqot orqali muhokama qilish taklif etildi. Yigʻilish tegishli qaror qabul qilinishi bilan yakunlandi.
