Rossiyada maʼlumotlar markazlarini yer ostida joylashtirish taklif qilindi

Raqamli rivojlanish vazirligi rejasiga koʻra, maʼlumotlar markazlarini ahamiyatiga qarab uch toifaga ajratish rejalashtirilmoqda. Strategik obyektlar uchun yer osti inshootlari va bunkerlar, ikkinchi darajadagi obyektlar uchun esa yer ustidagi kapital binolar afzal hisoblanadi. Korporativ maʼlumotlar markazlarini oddiy yer usti binolarida joylashtirish mumkin. Joy tanlashda, shuningdek, obyektning davlat chegarasi, aerodromlar, yoqilgʻi-energetika majmuasi obyektlari va yirik transport uzellarigacha boʻlgan masofasini hisobga olish tavsiya etiladi.

Tavsiyalarda binolarni mustahkamlash, server zallari, sovitish va elektr taʼminoti tizimlarini zarba toʻlqini hamda parchalardan himoya qilish koʻzda tutilgan. Operatorlarga, shuningdek, radioelektron kurash vositalaridan va havo tahdidlariga qarshi tizimlardan foydalanish, hayotiy muhim xizmatlarni zaxiralash hamda Mudofaa vazirligi, Favqulodda vaziyatlar vazirligi, Rossiya Milliy gvardiyasi va tezkor xizmatlar bilan hamkorlik qilish taklif etilmoqda.

Hujjat Rossiyaning turli hududlarida Yandex, Sberbank va VK maʼlumotlar markazlariga uchuvchisiz qurilmalar yordamida uyushtirilgan hujumlardan keyin tayyorlangan. Bozor ishtirokchilari qoʻshimcha xarajatlarni nafaqat himoya tizimlari, balki elektr energiyasining qimmatlashishi, uskunalar tanqisligi va asosiy stavkaning yuqoriligi bilan ham bogʻlamoqda.