Ozdiruvchi preparatlar AQSh aviakompaniyalariga yiliga 580 mln dollargacha tejash imkonini berishi mumkin
178 nafar yoʻlovchining oʻrtacha vazni 10 foizga kamaytirilsa, yuklangan Boeing 737 MAX 8 samolyotining umumiy massasi taxminan 2 foizga qisqargan boʻlardi, deb yozadi FT.
Bunday bahoni Jefferies investitsiya banki tahlilchisi Sheila Kahyaoglu keltirdi. Hisob-kitob AQShning toʻrtta eng yirik aviakompaniyasiga taalluqli boʻlib, ozdiruvchi preparatlarning keng qoʻllanilishi tufayli yoqilgʻi xarajatlaridan yiliga 580 mln dollargacha tejashni nazarda tutadi.
Boʻshagan massa zaxirasidan tashuvchilar tijoriy yuklarni tashish uchun foydalanishi mumkin edi. Aviakompaniyalar samolyotlar massasini allaqachon yengilroq idishlar, ichimliklar uchun aravachalar va yupqaroq qogʻozlardan foydalanish orqali kamaytirmoqda: United Airlines 2018-yildan beri bort jurnalida yengilroq qogʻozdan foydalangani hisobiga har yili taxminan 300 ming dollar tejab kelgan.
Shu bilan birga, ozdiruvchi preparatlarni qabul qilayotgan yoʻlovchilar aviakompaniyalarga qoʻshimcha daromad keltiradigan gazaklar va gazlangan ichimliklarni kamroq xarid qilishi mumkin.
