Oʻzbekistonda aholi uchun propan narxi 2,5 baravarga oshadi
15-noyabrdan Oʻzbekistonda maishiy propan narxi bir kilogramm uchun 2 ming soʻmdan 5 ming soʻmgacha oshadi. Ehtiyojmandlarga xarajatlarning bir qismini qoplash uchun kompensatsiya beriladi.
Ehtiyojmand oilalarga bir kilogramm uchun 3 ming soʻm miqdorida kompensatsiya toʻlanadi, biroq kompensatsiya oyiga koʻpi bilan 20 kilogramm uchun beriladi. Maksimal toʻlov 60 ming soʻmni tashkil etadi. Koʻmak 2030-yil 1-yanvargacha amal qiladi.
Kompensatsiyani Ijtimoiy reyestrga kiritilgan oilalar, belgilangan mezonlarga javob beradigan kam taʼminlangan xoʻjaliklar, shuningdek, yetim bolalari va ota-ona qaramogʻidan mahrum boʻlgan bolalari bor oilalar olishi mumkin. Gaz xaridi tasdiqlanganidan soʻng pul mablagʻlari ijtimoiy kartalarga oʻtkaziladi.
Bir manzilda yashovchi bir nechta oilalar texnik talablarga rioya qilgan taqdirda alohida gaz ballonlarini olishi mumkin.
