Istanbulda Oʻzbekiston–Turkiya turizm forumi boʻlib oʻtdi
Istanbulda Oʻzbekiston va Turkiya turoperatorlari qoʻshma turistik mahsulotlar hamda Turkiyadan Oʻzbekistonga sayyohlar oqimini oshirishni muhokama qildi.
Forum Turkiya Madaniyat va turizm vazirligi bilan hamkorlikda tashkil etildi. Unda Oʻzbekistonning tarixiy-madaniy merosi, ziyorat turizmi imkoniyatlari, turistik infratuzilmasi va sayohatlarning yangi yoʻnalishlari taqdim etildi.
Tadbir doirasida ikki mamlakat turoperatorlari oʻrtasida B2B uchrashuvlar boʻlib oʻtdi. Ishtirokchilar qoʻshma turistik paketlar va dasturlarni rivojlantirish, shuningdek, ishbilarmonlik aloqalarini mustahkamlashga kelishib oldi. Turkiya OAV vakillariga Oʻzbekiston turizm sohasidagi islohotlar haqida maʼlumot berildi va mamlakatning turistik salohiyatini Turkiyada targʻib qilish masalasi muhokama qilindi.
