Germaniyada 800 yillik qasr bir yevroga sotilmoqda
Germaniyaning Bad-Dyuben shahrida qariyb 800 yillik oʻrta asrlarga oid Shnadits qasri sotuvga qoʻyildi. Uni ramziy bir yevroga sotib olish taklif qilinmoqda, biroq bitim shartlarida qoʻshimcha xarajatlar ham koʻzda tutilishi mumkin, deb xabar berdi Bild.
Qasrning maydoni qariyb 1012 kvadrat metrni tashkil etadi. Binoda ritsarlar zali va ikkita minora saqlanib qolgan. Biroq tarixiy inshoot keng koʻlamli restavratsiyaga muhtoj, restavratsiya qiymati esa taxminan €20 mln deb baholanmoqda.
1945 yilda milliylashtirilganidan keyin qasrda pochta, bolalar bogʻchasi va maʼmuriy xonalar joylashgan. 2014 yilda uni Amerikadan kelgan investorlar sotib olib, mehmonxona-restoran majmuasini ochishni rejalashtirgan. Biroq mablagʻ yetishmagani sababli loyiha 2018 yilda toʻxtatilgan, qasr esa yana munitsipal mulkka qaytgan.
Mahalliy hokimiyat tarixiy binoni yodgorliklarni muhofaza qilish talablari asosida tiklay oladigan yangi egani topishga umid qilmoqda.
