Toshkentda Comedy Arena — hajvchilar uchun 50 mln soʻmgacha mukofotli tanlov taqdim etildi
Toshkent, 2026-yil 6-noyabr. Sahna Stand Up Clubʼda Comedy Arena — hajvchilar uchun yangi tanlov shousining ishga tushirilishiga bagʻishlangan matbuot anjumani boʻlib oʻtdi. Loyihani Uztelecom koʻmagida Xanda ijodiy uyushmasi amalga oshirmoqda. Tanlovda 18 yoshdan oshgan istalgan kishi ishtirok etishi mumkin. Har bir son gʻolibi 5 mln soʻm, beshta sonda gʻolib boʻlgan ishtirokchi esa 50 mln soʻmlik supermukofot sohibiga aylanadi.
Hazilning barcha janrlari uchun sahna
Comedy Arena O‘zbekiston komiklari uchun asosiy musobaqa maydoni sifatida yaratilgan. Janr bo‘yicha cheklovlar yo‘q: sahnaga stendap, qo‘shiq, etyud, sahna ko‘rinishi, pantomima yoki istalgan boshqa format bilan chiqish mumkin. Bir chiqish uchun 3 dan 8 daqiqagacha vaqt beriladi.
Ishtirokning majburiy sharti — yangi material. Chiqish avval ijro etilgan hazilga oid chiqishlarni takrorlamasligi kerak.
Sahnaga hech kimga tanish bo‘lmagan yangi ishtirokchilar ham, yulduzlar ham chiqishi mumkin — bu yerda ism hech qanday ustunlik bermaydi. Muhimi — hakamlar va zalni kuldirish. Qoida oddiy: kulgili bo‘lsa — qolasan, kulgili bo‘lmasa — ketasan. Qiziqarli chiqishni hakamlar to‘xtatmaydi, hatto ular bilan hazilomuz "bahsga" kirishish ham mumkin.
Yakka holda yoki to‘rt kishigacha bo‘lgan jamoa tarkibida chiqish mumkin. Ariza darhol butun tarkib nomidan topshiriladi, jamoa tarkibining asosini esa o‘zgartirib bo‘lmaydi.
Shouga qanday chiqish mumkin
Arizalar loyiha Telegram-boti @Comedyarenabot orqali qabul qilinadi. Ro‘yxatdan o‘tgach, ishtirokchiga Sahna’ga kelib, o‘z chiqishini namoyish etishi kerak bo‘lgan vaqt belgilanadi. Kastingdan o‘tgan ishtirokchilar bilan murabbiylar va hakamlar ishlaydi, shundan so‘ng sonni suratga olish uchun eng yaxshi sakkiz nafargacha ishtirokchi saralab olinadi.
Mukofotlar va hakamlar hay’ati
Har bir sonda bitta g‘olib aniqlanadi — u 5 mln so‘m oladi. Har bir tur umumiy asoslarda o‘tkaziladi, qo‘lga kiritilgan g‘alabalar esa mag‘lubiyatdan keyin ham bekor qilinmaydi. Besh marta g‘alaba qozongan ishtirokchi 50 mln so‘mlik supermukofotni oladi.
Chiqishlarni uch kishidan iborat hakamlar hay’ati baholaydi. Hay’at raisi — so‘zning tan olingan ustasi, janr afsonasi Zokir Ochildiyev. Qolgan ikki hakamni tashkilotchilar taniqli insonlar orasidan taklif qiladi. Ovoz berishda zaldagi tomoshabinlar ham ishtirok etishi mumkin.
