Dunyoda internetdan aholining qariyb toʻrtdan uch qismi foydalanadi
Xalqaro elektraloqa ittifoqi (ITU)ning yangi hisobotiga koʻra, 2026-yilda internet foydalanuvchilari soni 6,3 milliard kishiga yetdi.
Shu bilan birga, sayyoramizning qariyb 2 milliard aholisi hanuz internetdan tashqarida qolmoqda, deb xabar beradi Naked Science Visual Capitalist infografikasiga tayanib.
2024–2025-yillar ma’lumotlari asosida tuzilgan xaritaga ko‘ra, Bahrayn, Quvayt, Saudiya Arabistoni va BAAda internet qamrovi deyarli 100 foizni tashkil etadi. Daniya, Lyuksemburg, Monako va Norvegiya bu ko‘rsatkichlarga yaqinlashmoqda. Internet foydalanuvchilari ulushi bo‘yicha Malayziya AQSh va Yaponiyadan oldinda.
Eng past ko‘rsatkichlar Burundi (8,6%), Uganda (8,95%), Chad (12,63%), Markaziy Afrika Respublikasi (13,78%) va Afg‘onistonda (16,09%) qayd etilgan.
Mamlakatlar o‘rtasidagi tafovut aholining daromadlari, aloqa xizmatlaridan foydalanish imkoniyati va raqamli infratuzilmaning rivojlanishidagi farqlar bilan izohlanadi. Ulanishlar soni ortib borayotganiga qaramay, insoniyatning qariyb chorak qismi hanuz internetdan foydalanmaydi.
Manba: datahub.itu.int
