Fizik oʻtmishga sayohat qilish mumkin boʻlmaydigan shartlarni maʼlum qildi
Xitoydagi Jinan universiteti tadqiqotchisi Hongsheng Zhang Koinotning ayrim modellarida oʻz oʻtmishiga qaytishni istisno etish imkonini beradigan matematik mezonni taklif qildi, deb xabar bermoqda Euronews.
Uning hisob-kitoblariga koʻra, agar fazo-vaqt yorugʻlikning tarqalishi bilan bogʻliq alohida sirtlarga ajratilsa, inson yoki boshqa obyekt ularni faqat vaqtning bir yoʻnalishida kesib oʻtishi mumkin. Bunday holatda dastlabki lahzaga qaytib boʻlmaydi — xuddi faqat yuqoriga olib chiqadigan zinadan pastga tushib boʻlmagani kabi.
Biroq nazariyaning istisnolari bor. Fazo-vaqtning muayyan geometriyasida, masalan, aylanayotgan qora tuynuklar yaqinida yoki noodatiy topologiya sharoitida bunday «vaqt halqalari» matematik jihatdan mumkin. Bu amalda ishlaydigan vaqt mashinasi mavjudligini isbotlamaydi.
Vaqtning sekinlashuvidan foydalanib kelajakka sayohat qilish fizik jihatdan mumkin: nihoyatda katta tezlikda harakatlanganda yoki kuchli gravitatsiya maydonida sayohatchi uchun vaqt atrofidagi boshqa kuzatuvchilarga qaraganda sekinroq oʻtadi.
