WSJ: AQShda narxlarni tezda pasaytirish uchun demokratlarning imkoniyatlari kam
Oraliq saylovlardagi gʻalabadan soʻng demokratlar 3-yanvar kuni Kongressning har ikki palatasi ustidan nazoratni qoʻlga oladi. Biroq saylovchilarning asosiy kutganini — yaʼni hayotni arzonlashtirishni — amalga oshirish ular uchun oson boʻlmaydi, deb yozadi The Wall Street Journal.
Nashr qonun chiqaruvchilarning imkoniyatlari cheklanganini taʼkidlaydi. Soliqlar va xarajatlar boʻyicha qarorlar sekin taʼsir koʻrsatadi, Donald Tramp esa veto huquqiga ega. Senatda filibasterni yengish uchun 60 ta ovoz kerak, demokratlarda esa hozircha 54 ta oʻrin bor. Energiya resurslari qimmatlashishiga sabab boʻlgan Erondagi urushni toʻxtatish ham yangi koʻpchilik uchun qiyin boʻladi.
Senatda demokratlar Kanadaga qarshi joriy etilgan bojlarni bekor qilish boʻyicha ovoz berishga tayyorgarlik koʻrmoqda. Vakillar palatasida esa ular qisqartirilgan Medicaid moliyalashtirilishini va tibbiy sugʻurta subsidiyalarini qayta tiklamoqchi. Biroq WSJ ogohlantirishicha, soliqlarni oshirmagan holda toʻlovlarni kengaytirish inflyatsiyani tezlashtirishi mumkin. Sentabr oyigacha boʻlgan 12 oyda inflyatsiya allaqachon 3,7 foizni tashkil etgan, ish haqi esa shu davrda atigi 3,1 foizga oshgan.
Shtatlarda partiyaning manevr qilish imkoniyati kengroq. Yangi demokrat-gubernatorlar sunʼiy intellekt uchun maʼlumotlar markazlari qurilishini cheklash va tibbiy qarzlarni hisobdan chiqarishni vaʼda qilmoqda.
