YI Ukraina va Rossiyaning Abu-Dabidagi tinchlik muzokaralariga qoʻshma guruh yuboradi
Yevrokomissiya va Yevropa kengashi Ukraina, Rossiya va AQSh oʻrtasidagi uch tomonlama muzokaralarga qoʻshma delegatsiya yuboradi. Uchrashuv 10 va 11 noyabr kunlari Abu-Dabida boʻlib oʻtadi.
Yevropa guruhiga Ursula fon der Lyayen apparati rahbari Byorn Zaybert va Antoniu Kostaning tashqi siyosat boʻyicha maslahatchisi Anna-Mariya Bura boshchilik qiladi. Muzokaralarda ular bilan birga Fransiya, Germaniya va Buyuk Britaniya ham ishtirok etadi.
Fon der Lyayen arafada Vladimir Zelenskiy bilan suhbatlashdi. U Zelenskiyning oziq-ovqat va energetika infratuzilmasiga ham tatbiq etiladigan sulh haqidagi chaqirigʻini qoʻllab-quvvatladi hamda Qora dengizda kemalar qatnovi erkinligini yoqladi.
Bryussel Moskva bilan toʻgʻridan-toʻgʻri muzokara oʻtkazishga tayyor, biroq hozircha bunday uchrashuvni tashkil etishning imkoni boʻladimi-yoʻqmi, nomaʼlum.
Delegatsiya tarkibi haqidagi qaror Italiya bosh vaziri Jorjia Melonining Kosta nomiga yoʻllagan maktubidan keyin qabul qilindi. Meloni diplomatik formatlardagi «tartibsizlik»dan shikoyat qilib, YI maxsus vakilini tayinlashni talab qildi.
Uch tomonlama muzokaralar fevraldan buyon ilk bor qayta boshlanadi. Ukraina delegatsiyasiga Rustem Umerov, Rossiya delegatsiyasiga esa Vladimir Medinskiy boshchilik qiladi. AQSh nomidan maxsus vakillar Stiv Uitkoff va Jared Kushner qatnashadi.
